- Fruituola proiektuaren barruan kokatzen den prestakuntza ikastaro honen lehen jardunadiak plaza guztiak bete ditu, 30 guztira. Prestakuntza honek beste hiru saio gehiago izango ditu 2026ko udara arte.
Ostegunean, Muxikan egin zen “Udazkeneko inausketa berdea: funtsezko teknikak eta praktikak” izeneko ikastaroaren lehen saioa arrakasta handiz hasi zen. Urremendi Landa Garapen Elkarteak antolatu, Urdaibai Biosfera Erreserbako Zerbitzuak (Eusko Jaurlaritzaren Industria, Trantsizio Energetiko eta Jasangarritasun Sailaren menpe) bultzatu eta HAZI Fundazioak finantzatutako ekimen hau Fruituola proiektuaren parte da, eta frutagintza sektoreari eta oro har nekazaritza ekosistemari lotutako pertsonen gaitasunak indartzea du helburu.
Fruituola Busturialdea-Urdaibain abiarazitako ekimen berritzaile bat da, inguruko nekazari profesionalen lursailetan fruta-arbolen hainbat sail ekologiko instalatzea eta garatzea ahalbidetuko duena. Helburua da ezagutza sortzea, testatzea eta transferitzea, fruta ekologikoaren ekoizpena handitzea eta baratze-ustiategien jarduera dibertsifikatzea. Horrez gain, eskola-jantokiak fruta freskoz eta kalitatez hornitzea eta finken errentagarritasuna sustatzea bilatzen du, fruta-baratze intentsiboaren ereduaren bidez. Proiektuak, gainera, ezagutza eta berrikuntza-sistema dinamizatzen du, nekazariei, teknikariei eta nekazaritzako elikagaien sistema jasangarrietan interesa duten herritarrei irekia.
Ikastaroa frutagintza sektorean sartu nahi duten pertsonei eta nekazaritza ekosistemako teknikariei zuzenduta dago, eta lau prestakuntza jardunaldi ditu guztira. Lehen hitzordu honek ikuspegi teoriko-praktikoa izan du, fruitua bildu ondoren inausketa berdearen oinarriak sendotzeko eta benetako ustiategietan aplikatzeko, zehazki, sagarrondo-sail batean. Lehen saio honen ondoren, hurrengo hitzorduak 2026ko otsailean, udaberrian eta uda garaian egingo dira, prestakuntzaren eta praktikaren etengabeko jarraipena bermatzeko.
Ikastaroaren lehen saioa Aitor Etxeandiak gidatu du, frutagintzan eskarmentu handia duen nekazaritzako ingeniari teknikoak, eta Josu Uruburu ekoizle ekologikoaren ustiategian garatu den saio praktiko bat ere izan du.
Aitziber Ansotegi Urremendi Landa Garapen Elkarteko gerenteak azpimarratu duenez, “parte-hartzearen arrakasta honek berretsi egiten du eskualdean kalitatezko nekazaritza-prestakuntzarekiko dagoen interesa. HAZIren laguntzarekin, Fruituola funtsezko proiektu gisa sendotzen ari da frutagintza jasangarria bultzatzeko eta landa-ingurunean aukera berriak sortzeko“.
Prestakuntza honekin, Urremendik lehen sektoreko berrikuntzarekin, nekazaritzaren jasangarritasunarekin eta landa eremuan lan egiten eta trebatzen diren pertsonen gaitasunen hobekuntzarekin duen konpromisoa indartzen du.
