- Busturialdeko eskualdeko turismoaren kudeaketaz arduratzen den erakundeak atxikimendu ziurtagiria jaso zuen atzo Gasteizen, Eusko Jaurlaritzako Turismo, Merkataritza eta Kontsumo Sailak antolatutako ekitaldian, Euskadiko beste 85 erakunderekin batera.
Urremendi, Busturialdea-Urdaibain turismo-jarduera kudeatzen eta koordinatzen duen Landa Garapeneko Elkartea, Euskadiko Turismoaren Kode Etikoari atxikitako erakunde berria da. Ziurtagiria atzo banatu zen Gasteizen, Javier Hurtado Eusko Jaurlaritzako Turismo, Merkataritza eta Kontsumoko sailburua buru izan zuen ekitaldian. Bertan, jasangarritasuna, etika eta erantzunkidetasuna bezalako balioekin lerrokatutako turismoa sustatzearen garrantzia azpimarratu zen.
Atxikimendu honekin, Urremendi batzen da gero eta zabalagoa den sare batera, ingurunea, kultura eta pertsonak erdigunean jartzen dituen turismo eredua sustatzen duten enpresa eta erakundeekin batera. Eusko Jaurlaritzak, Basquetourren bitartez, bultzatzen duen ekimen honen helburua da turismoak lurraldearen garapenean positiboki eragitea, kalteak gutxituz eta onurak gizartera zabalduz.
Ziurtagiria eskuratzeko, formakuntza prozesu bat eta auditoria bat egin dira, Kodeak jasotzen dituen sei printzipioak betetzen direla egiaztatzeko: berdintasuna, inklusioa eta tolerantzia; iraunkortasuna; kultura sustatzea; ondarea zaintzea; bikaintasuna eta profesionaltasuna; eta eskubideen errespetua.
Gaur egun, Urdaibain 41 enpresa daude akreditatuta, Urremendi Landa Garapen Elkartea bera barne.
Aitziber Ansotegik, Urremendiko gerenteak, eskertu egin du jasotako aitortza, eta honakoa nabarmendu du: “Urdaibain badakigu ez dagoela turismorik lurralderik gabe, ezta garapenik errespeturik gabe ere. Aitorpen honek indartu egiten du ingurunearekin, kulturarekin eta pertsonekin konprometitutako turismo arduratsu eta jasangarri baten aldeko gure apustua. Turismoaren Kode Etikoari atxikitzea gure konpromisoa sendotzeko eta eskualdearen ongizatea ardatz duen eredu baten alde urrats bat gehiago egiteko modu bat da“.
