- Urdaibai zazpi jomuga finalistetako bat da, National Geographic-eko 2026ko Bidai Irakurleen Sarien IV. edizioko “Jomuga jasangarririk onena” kategorian. Herri-bozketaren bidez aukeratuko dira sarituak.
- Hautagaitza honek beste aurrerapauso bat suposatzen du Urdaibaik azken urteotan garatzen ari den turismo eredu jasangarri, orekatu eta konprometituari dagokionez.
- “Viajes National Geographic”-eko irakurleek eta haien komunitate digitalak aukeratuko dituzte jomuga irabazleak, otsailaren 22ra arte zabalik egongo den herri-bozketa baten bidez.
Urdaibai National Geographic-eko 2026ko Bidaia Irakurleen Sarien IV. edizioko “Jomuga Jasangarri Onena” kategoriako zazpi hautagai finalistetako bat da. Sari hauek turismo arduratsuarekin, ingurunea errespetatzearekin eta jasangarritasun-balioekin lerrokatuta egoteagatik nabarmentzen diren jomugak aintzatesten dituzte.
Hautagaitza mugarri berri bat da Urdaibairentzat, turismo-plangintzan, lurraldearen kudeaketa orekatuan eta bertako natura eta kultura-ondareari balioa ematean egiten ari den etengabeko lana aitortuz.
Urremendi Landa Garapenen Elkarteak, Urdaibaiko turismo-kudeaketaren ardura duen erakundeak, oso positibotzat jo du izendapen hori. “Hautagaitza hau aspaldidanik egiten ari garen bidearen emaitza da: ingurua kontserbatu, tokiko biztanleen ongizatea zaindu eta bisitatzen gaituztenei kalitatezko esperientzia eskaintzeko egiten den lana aitortzen du, eredu turistiko orekatu baten aldeko apustua“, adierazi du Aitziber Ansotegi Urremendiko gerenteak.
Ansotegik nabarmendu duenez, aitorpen hau “ez da ekintza puntual baten emaitza, eskualdearen talde-lanaren, erakundeen, tokiko eragileen eta turismo-sektorearen arteko lankidetzaren eta jasangarritasuna Urdaibaiko turismo-garapenaren erdigunean jartzen duen estrategia partekatu baten emaitza baizik“.
Herritarrentzako bozketa irekia
National Geographic Bidaiak aldizkariko irakurleen sariak herri-bozketaren bidez erabakitzen dira. Aldizkariko irakurleek eta komunitate digitalak aukeratuko dituzte kategoria bakoitzeko jomuga irabazleak. Bozketen azken emaitzak apirilaren 21ean jakinaraziko dira.
Botoa emateko aukera otsailaren 22ra arte egongo da zabalik, esteka honen bitartez:
Urremenditik parte hartzeko deia luzatzen da, eta azpimarratu da “hautagaitza hau babestea Euskadin Urdaibai bezalako enklabe zoragarri bat izatearen harrotasuna erakusteko modu bat ere badela, turismo jasangarrian eta lurraldearen kudeaketa arduratsuan erreferente dena“.
Urdaibaiko turismo-estrategiari beste aintzatespen bat
Hautagaitza honek azken urteetan lortutako beste aintzatespen batzuekin bat egiten du, eta Urdaibai jomuga turistiko heldu gisa sendotzen du, jasangarritasunarekin, desestazionalizazioarekin eta bisitari-fluxuen banaketa orekatuarekin konprometituta. Eredu honek kalitatea lehenesten du kantitatearen aurretik, eta tokiko ekonomiaren garapen arduratsuari eta biztanleriaren ongizateari laguntzen dio.
Urremendi Landa Garapen Elkarteak oso positibotzat jo du National Geographic bezalako aldizkari batek Urdaibai munduko zazpi jomuga onenen artean aukeratu izana, “horrek esan nahi du jarraitzen ari garen lan-ildoa egokia dela“.
