- Lurraldetik bertatik sortzen den nortasun partekatua da, eskualdeko nekazaritza-elikagaien sektorearen ikusgarritasuna, kohesioa eta proiekzioa sustatzeko helburuz.
- Irudi berriaren xedea lurraldearekiko errotzea, hurbiltasuna, jasangarritasuna eta kalitatea islatzea da, Busturialdea-Urdaibain komunitatea sendotzeko, zaintzeko eta eraikitzeko modu baten adierazpen gisa.
Busturialdea-Urdaibaik lehen sektorerako nortasun partekatu berria du, EHUN. Gaur goizean aurkeztu da BBK Kliman (Busturia) eskualdeko ekoizleen, eragileen eta erakundeen lana batu, ordezkatu eta proiektatzen duen sare kolektibo gisa sortutako marka berria. Ekitaldian parte hartu dute, Aitziber Ansotegi Urremendi Landa Garapen Elkarteko gerenteak, Joseba Santorum Urdaibaiko Biosfera Erreserbako Zerbitzuaren zuzendariak, Ager Lejarreta Urremendi Landa Garapen Elkarteko presidenteak, Andoni Agirrebeitia Bizkaiko Foru Aldundiko Nekazaritza zuzendaria, Garazi Llona Baserrik Gernikara elkarteko kidea eta beste hainbat ordezkari instituzionalek eta sektoreko eragileek ere.
Ekitaldiak azken hilabeteetan garatutako parte-hartze prozesu baten emaitza ezagutzera emateko balio izan du, non sektorea bera izan den protagonista. ‘EHUN – Bizitzaz josita’ ez da kanpotik etorritako proposamen gisa sortu, baizik eta barrutik eraikitako nortasun baten adierazpena da, entzutean, hausnarketa partekatuan eta elkarlanean oinarrituta.
Partaidetzatik ehundutako proiektu kolektiboa
EHUN, batez ere, proiektu kolektiboa da. Busturialdea-Urdaibaiko lehen sektorea eusten duten pertsonen eguneroko lanari egindako aitortza argia.
Aurkezpenean izaera partekatu hori jarri da erdigunean, marka esku askoren artean eraikitako prozesu baten emaitza dela azpimarratuz. Inkestek, lan-mahaiek eta elkarrizketa-guneek sektore anitz baten ekarpenak jasotzea ahalbidetu dute, errealitate anitz baina konektatu bati erantzuten dion nortasuna osatuz.
“EHUNen balioa, hain zuzen ere, sektoretik bertatik sortzen dela da. Ez da marka bat soilik; hobeto antolatzeko, ikusgarritasuna irabazteko eta etorkizuneko erronkei modu bateratuan aurre egiteko aukera ematen digun tresna da”, nabarmendu du Aitziber Ansotegi Landa Garapen Elkarteko gerenteak.
Emaitza nortasun bat da, ez bakarrik ikusgarritasuna ematen duena, baizik eta lurraldean lanean ari direnen ahalegina, kalitatea eta konpromisoa aitortu eta balioan jartzen dituena. Ildo horretan, antolakuntzatik eskerrak eman zaizkie prozesuan parte hartu duten pertsona eta erakunde guztiei, haien inplikazioa, konpromisoa eta eskuzabaltasuna nabarmenduz.
Era berean, ekitaldiak solasaldi labur bat ere barne hartu du, erakundeetako eta sektoreko zenbait ordezkariren artean, eta bertan partekatu dira EHUNek eskualdean izango duen paperari, markaren oinarrian dauden balioei eta Busturialdea-Urdaibaiko lehen sektorearen kohesioa, belaunaldiarteko erreleboa, ikusgarritasuna eta etorkizuna indartzeko duen gaitasunari buruzko gogoetak.
Sektore osoa batzen duen eta zentzua ematen dion marka
EHUN helburu argi batekin sortu da: Busturialdea-Urdaibaiko lehen sektore osoa bildu eta koherentzia emango dion aterki bihurtzea. Marka honen pean integratzen dira eskualdeko nekazaritza-elikagaien ekosistema osatzen duten jarduerak, ekimenak, produktuak eta eragileak. Ekoizpenetik eraldaketara, merkaturatzea eta sustapena barne, EHUNek irudi bateratu bat eskaintzen du sektorearen balioa modu sendoan aurkezteko aukera emanez.
“Sektore estrategiko bati buruz ari gara; EHUN bezalako markei esker, bere posizionamendua indartu, aukera berriak sortu eta eskualdeko ekonomiaren barruan duen rola sendotu dezake”, gaineratu du Ansotegik.
Marka zurrun bat baino gehiago, EHUN etengabe eraikitzen ari den sare bizia da, errealitate anitzak nortasun partekatu beraren pean lotzen dituena. Egitura malgua baina indartsua du, sektorearekin batera egokitu eta hazteko gai dena.
EHUN ez da ezerrezetik jaio; aitzitik, dagoeneko martxan dauden proiektuak biltzen ditu, bere izaera eraldatzailea eta ekintza zehatzetara egiten duen jauzia agerian uzten dutenak. Horren adibide da Fruituola, dagoeneko abian den ekimen pilotua: eskualdeko jantoki kolektiboetara bideratutako bertako sagar ekologikoa ekoizten hasi da, hurbileko elikadura-katea sendotzeko beharrari erantzunez. Bestetik, Jakigune, nekazaritza-elikaduraren arloko ekintzailetzarako partekatutako gune fisiko gisa pentsatua, ekoizpena, eraldaketa, banaketa eta hezkuntza uztartzeko aukera emango du; horrela, eragileen arteko sinergiak sustatu eta Busturialdea-Urdaibaiko sektorearen ehuna indartuko da.
Lurraldea egiteko eta bizitzeko modu bat definitzen duten balioak
Marka berria Busturialdea-Urdaibaiko lehen sektorearen esentzia definitzen duten balio multzo batean oinarritzen da. Horien artean nabarmentzen dira jasangarritasuna, lurraldearekiko sustraitzea, hurbiltasuna eta kalitatea; elementu horiek ez dute soilik produktuak bereizten, baizik eta lan egiteko eta ingurunearekin harremanak izateko modua ere bai.
EHUNek, horrela, ekoizpena ulertzeko modu bat jasotzen du, ikuspegi ekonomikotik harago doana, eta dimentsio sozialak, kulturalak eta ingurumenekoak barneratzen dituena. Egiteko modu bat da, zaindu, eutsi eta lurraldea eraikitzen duena, ekitaldian aurkeztutako ikus-entzunezko kontakizunean islatu den bezala.
“Urdaibaiko Biosfera Erreserba bezalako gune batean, lehen sektoreak funtsezko eginkizuna du paisaiaren, biodibertsitatearen eta oreka naturalen kontserbazioan. EHUNek funtzio hori balioan jarriko du eta gizarterantz proiektatzen laguduko digu”, adierazi du Joseba Santorumek, Biosfera Erreserbako Zerbitzuko zuzendariak.
Aurrerapausoa sektorea indartzeko eta etorkizuneko proiekzioa sendotzeko
EHUNen abiarazteak urrats estrategikoa dakar Busturialdea-Urdaibaiko lehen sektorearen ikusgarritasuna, posizionamendua eta kohesioa indartzeko.
Hemendik aurrera, marka baliabide izango da ekimen berriak bultzatzeko, profesional gehiago erakartzeko eta sektorea sostengatzen duen sarea biziberritzen jarraitzeko. Helburua argia da: eredu sendoago, aitortuago eta konektatuago baterantz aurrera egitea, egungo eta etorkizuneko erronkei erantzuteko gai izango dena.
EHUN ez da, beraz, helmuga, abiapuntua baizik. Etorkizuna ehuntzen jarraitzeko oinarri komun bat, sektorea indartuz eta eskualdeko herritarrei kalitatezko produktuak, hurbilekoak eta lurraldeari lotuak eskainiz.
