- Urremendi Landa Garapen Elkarteak antolatutako organo-jaialdia uztailaren 13tik abuztuaren 15era izango da, eta guztira 12 kontzertu eskainiko dira Busturialdea-Urdaibai eskualdeko hainbat udalerritan.
- 2024ko edizioak, beti bezala, auditorium desberdinak betetzen dituzten entzule fidelak txunditu nahi ditu. Aurten, “Urdaibaiko Organoa eta Ahotsak” izenburupean, jaialdiak ahotsaren munduarekin bat egitearen aldeko apustua egin du. Kontzertuak eredu klasikoan garatuko dira, era desberdinetako ahotsekin: sopranoa, altua, tenorea eta kontratenorea, hirukoteak, laukoteak… Esperientzia musikal paregabe eta berritzaile bat eskainiko da.
- Jaialdiaren antolatzaileek aurkezpena baliatu dute instrumentu berezi hauen zaharberritze-lanekin etengabe jarraitzearen garrantziaz jabetzeko.
Urremendi Landa Garapenerako Elkarteak “Urdaibaiko Organoak-Joxe Mari Eguileor” jaialdiaren edizio berri bat antolatu du. Denboraren poderioz eta lan ona eginez, Europa mailako organo eta harmonium ikuskizunik nabarmenetakoa bihurtu da, eta 2023an bakarrik 3.500 pertsona baino gehiago bildu zituen “Folklorea eta organoa” izenburupean eskainitako dozena bat kontzertutan. Aitziber Ansotegi Urremendi Landa Garapen Elkarteko gerenteak, Joxe Benantzi Bilbao UOJEko koordinatzaileak, eta Begoña de Ibarra, Bizkaiko Foru Aldundiko Kulturako Zuzendari Nagusiak, Gernika-Lumoko Euskal Herria Museoan aurkeztu dituzte gaur goizean 20. edizio honen xehetasun guztiak, “Urdaibaiko Organoak eta Ahotsak” izenburupean.
Aurtengo apustu nagusia ahotsa eta organoa uztartzea da. Busturialdeko ondare instrumental zoragarriak soprano, altu, tenore, kontratenore, hirukote eta laukoteen ahotsekin bat egingo du, esperientzia musikal paregabea eta berritzailea eskaintzeko. Besteak beste, Sean Maxwell, Aitor Olea, Estibaliz Sánchez, Steffano Manfredini, Lorenzo Barbieri, Aitor Garitano edo Alessandro Bianchi izango dira eskualdean arituko diren artistak, Telemanes Hirukotea eta Laukote BEMIOPA taldeekin batera.
Jaialdiak 12 kontzertu izango ditu guztira eta uztailaren 13tik abuztuaren 15era eskainiko dira Busturialdea-Urdaibai eskualdeko hainbat udalerritako eliza ederretan. Azken urteotan ohi bezala, Mundakan hasi eta amaituko da kontzertu zikloa, eta bidean, Gernika Lumo, Kortezubi, Axpe-Busturia, Ibarrangelu, Arratzu, Bermeo eta Gautegiz-Arteaga bezalako herriak bisitatuko ditu.
Udalerri horietako organo eta harmoniumen ondare baliotsu eta bereziak, hala nola, Lorenzo de Arrazola maisuak Axpe-Busturiako Santa Maria eliza monumentalerako eraikitako organoa, urtero kalitate bikaineko musika-programazioaz harro egon daitekeen jaialdian entzungo dira, ekitaldian biltzen den publiko ugariaren gozamenarako.
Busturialdea-Urdaibaiko altxorra
“Jaialdi honek eskualdeari eskaintzen dion aberastasun kulturalak balio izugarria du” adierazi du Aitziber Ansotegik. “20 urte igaro dira ekimen berezi hau sortu zenetik. Gure elizetako ondare arkitektoniko eta artistiko ederra historia luzeko instrumentu hauen soinuarekin lotzen dugu. Zalantzarik gabe, bestelako proposamen bat da, gure kultura eta udako aisialdiko eskaintza dinamizatu, dibertsifikatu eta aberasten duena“, laburbildu du Urremendi Landa Garapene Elkarteko gerenteak. “Gurea zaintzeko modu bat da. Gure elizateetako eta hiribilduetako bizilagunen zuzeneko arbasoen ekarpen ekonomikoekin eraiki zen ondare horri balioa ematen diogu“, azpimarratu du.
Bestalde, Begoña de Ibarra, Bizkaiko Foru Aldundiko Kulturako Zuzendari Nagusiak, jaialdi hau erreferente nagusietako bat dela esan du, kulturak gure gizartean duen garrantzia nabarmentzen duen hitzordua. “Urdaibaiko Organoak-Joxe Mari Eguileor” jaialdiari esker, Busturialdea-Urdaibaik, Bizkaiak eta Euskal Herriak organo eta harmonium musikaren kultura berreskuratu dute eremu geografiko berezi eta izugarri eder honetan, Biosfera Erreserba bakarra Euskadin, hain zuzen ere. Proposamen iradokitzailea da, desberdina, eta balio handikoa, bi arrazoirengatik. Alde batetik, beti kalitatezko programazioa sendotzen duen jaialdia, aurten artista handien bisitarekin. Eta bestetik, Bizkaiko ondare garrantzitsu hori berreskuratzeko urte osoan egindako lanagatik“, adierazi du. “Zorionak eman nahi dizkiogu antolakuntzari 20 urteko lan eta dedikazioagatik, tresna berezi horiek berreskuratu eta balioan jartzeagatik, horietako asko bakarrak baitira munduan“, eskertu du aldundiko arduradunak.
Joxe Benantzi Bilbao, kontzertu zikloaren koordinatzailea, pozik agertu da urteurrenagatik. “Aurten ere, eta dagoeneko 20 dira, Busturialdea-Urdaibaik aurkezten duen ondare instrumental zoragarria erabiliko dugu Europa mailan ospe handiko eta finkatutako jaialdi bat ospatzeko. Oraingo honetan, gure eskualdera etorriko diren artista handien ahotsekin bat egitearen aldeko apustua egin dugu. 10 organo eta 2 harmonium entzun ahal izango ditugu 12 kontzertutan, edizio bakoitzean handituz doan publiko fidelaren gozamenerako. Iaz 3.500 pertsona baino gehiago hurbildu ziren, izugarria da tenpluetan sortzen den giroa“, azpimarratu du.
Bilbaok ez du zalantzarik izan aldi honetan egin den zaharberritze-lanaren garrantzia azpimarratzeko; izan ere, “tresna horien zaharberritzeak funtsezkoak dira ondarerako; izan ere, kasu askotan, udalerri edo eliza horiek ez lirateke gai izango, gaur egun, halako tresna bat eskuratzeko. Aurten, adibidez, Gautegiz-Arteagako eta Bermeoko San Frantziskoko organoek 140 eta 110 urte betetzen dituzte, hurrenez hurren. Efemerideak dira, eta nabarmendu egin behar dira lan horri perspektiba emateko. Gure kulturak bultzada bat behar du eta gure betebeharra hori berreskuratzea da“, adierazi du.
Zikloaren koordinatzaileak azpimarratu duenez, “etorkizuneko belaunaldiei gure arbasoek eraikitzen eta mantentzen saiatu ziren ondarea utzi behar diegu, askotan, gorabehera handien ondoren“. Azkenik, “harmoniumaren munduan egiten dugun lana bakarra da Euskadi osoan eta estatu osoan, instrumentu eder horiekin kontzertuak eskaintzen dituen jaialdi bakarra gara“, azpimarratu du.
Kontzertuen egutegia
Kontzertuak uztailaren 13etik abuztuaren 15era bitartean egingo dira, eta emanaldi gehienak asteburu eta jai egunetan programatu dira. Programazioa honako hau izango da:
- Uztailak 13 (20:00), Mundakako Andra Maria eleizan: AITOR OLEA.
- Uztailak 20 (20:00), Gernika-Lumoko San Pedro eleizan: SAEZ PUENTE ETA ESTÍBALIZ SÁNCHEZ (SOPRANOA).
- Uztailak 24 (20:00), Kortezubiko Santiago Apostolua eleizan: STEFFANO MANFREDINI Y LORENZO BARBIERI (BARITONOA).
- Uztailak 25 (20:00), Gernika-Lumoko San Bartolome-Mertzede parrokian: MIKEL ANSOLA Y AITOR GARITANO (TENOREA).
- Uztailak 26 (20:00), Axpe-Busturiako Andra Maria eleizan: SEAN MAXWELL.
- Uztailak 27 (20:00), Ibarrangeluko San Andrés eleizan: DULTZAINAK ETA MATIAS SAGRERAS.
- Uztailak 31 (20:00), Gernika-Lumoko Andra Maria eleizan: JESÚS MARTÍN MORO.
- Abuztuak 3 (20:00), Arratzuko Santo Tomas eleizan: BENANTZI BILBAO Y CARMEN PAULA ROMERO (SOPRANOA).
- Abuztuak 4 (20:00), Axpe-Busturiako Andra Maria eleizan: TELEMANES HIRUKOTEA.
- Abuztuak 5 (20:00), Bermeoko San Frantzisko eleizan: ALESSANDRO BIANCHI.
- Abuztuak 10 (20:00), Gautegiz-Arteagako Andra Maria eleizan: JAVIER ARTIGAS Y OLATZ SAITUA (SOPRANOA).
- Abuztuak 15 (20:00), Mundakako Andra Maria eleizan: LAUKOTE BEMIOPA (LAUKOTE BOKALA ETA ORGANOA).
Gogoratu behar da jaialdiak Bizkaiko Foru Aldundiaren, Eusko Jaurlaritzaren eta udalerri hauen babesa duela: Arratzu, Bermeo, Busturia, Gernika-Lumo, Ibarrangelu, Gautegiz-Arteaga, Kortezubi eta Mundaka. Aurtengo edizioko organo, programa, artista, argazki eta bideoei buruzko informazio gehiago www.uoje.org web orrialdean eta Facebook-eko eta Instagram-eko profiletan kontsulta daiteke.
